Illustrated by KY Wong
(持續收集中，如你希望在此分享你與「碧街事變」的故事和看法，請email到：leefung8964@gmail.com)
o 陳太（茶餐廳老板娘）：彌敦道的暴動？我記得丫，果d不良份子嚟嫁，我最憎呢d人，趁火打劫！最記得咩？果時匯豐跌到得6蚊咋，我唔識股票都記得，很多朋友都好肉痛，香港人最擔心都係呢d嫁嘛。
o 華哥（麻雀館職員）：六月七日，彌敦道的暴動，那時剛收工，去搭車，剛好被我見到。主要係d人撞閘、掟野、掟垃圾桶之類，很隨機。（我在麻雀館都聽到人撞閘）我唔知呢班攪事份子來自邊度，或者係途人見狀發洩情緒、即興加入。市民心聲都係覺得要平反的，一來香港要被大陸收返，大家覺得將來會唔會用同樣方法鎮壓我地，同時覺得，嘩！點解要鎮壓呀？新聞片段所見，當年學生無做什麼破壞，只係靜坐，叫口號，係和平咁表達訴求...
o 榮哥（ 生果檔老板）：那次是我生平第一次參與遊行，因為覺得中國政府唔啱，要講佢知佢做得唔啱，就係一百萬人那次，在銅鑼灣百德新街，好多人... 彌敦道的暴動？當時都係見到d人掟下水樽，應係d人對公安和解放軍的不滿，轉移到警察身上吧...究竟係咩人組織？我諗都係果d咩支聯會掛。
o 成哥（江湖人士）：當年彌敦道單野，我都有份掟野，係我大佬叫我地做野的...
o 肥佬（水果檔老板）：我今年68歲，喺碧街19號出世，一直住係油麻地。我經歷過六七暴動，八九年那次也親身在場目擊。那時，有人燒車，有古惑仔到處搶掠。因為當時我認識一些果欄嘅朋友，所以才避過一劫。當時連附近的一間麻雀館都成為滋事分子嘅搶掠目標，但麻雀館既員工用滾水淋向滋事分子，那才趕走了他們。其實，我知道當年帶頭搶掠嘅蠱惑仔今天仍然在油麻地。
o 飛虎哥（退休人士）：我今年65歲，當年我都算係叱咤一時。彌敦道果單野，當時有一批古惑仔到處攪事，他們都手纏黑布帶，沿彌敦道一帶搶掠，而黑色布帶就每條賣十蚊，見到冇帶黑布帶嘅就打。
o H 先生（社工）：我老婆當年係沙田做青年服務，有d client係古惑仔。佢地話當時係佢地大佬落柯打叫佢地出旺角攪事，仲準備定一箱箱玻璃樽放曬係貨van準備用來掟... 有人等登攪事就可以話係幾肯定，但你唔知係收到大陸指示，定係港英政府入面有人攪鬼嘅啫。
o 網民a: 呢單野我有聽返班叔父講，前一晚知情既已經收到風果晚千萬唔好出旺角, 有社團襯六四單野亂成機出去搶野。照睇當年社團未似宜家咁上晒軌, 又應該未歸順中共, 可能真係兩件事
o 網民b: 你地想得太多啦,我當年都有份去,實情係自發性反64,之後一班貨車佬,後生果班就玩野,因為冇王管,當時d車直情係相反行車警察都唔敢理,所以有d人就借d意發洩同想搶野,同類事件84年的士罷駛時都試過
o 陸生（獎盃鋪老板）：彌敦道單野真係無咩印象，因為當時有好多事發生，加上只係一晚半晚的事，唔算重要，所以無咩特別印象。反而是我最記得當年六四那一晚，我從家裡趕回上海街的工作室工作，那時應已是零晨，但成條上海街的屋企都著灑燈，見到d電視的光閃閃下，當時已是深夜，大家都無訓，在家看新聞。另外，我記得當時連旺角那邊的性工作者都組了一隊出來遊行，當年社會都未有而家咁開放，但她們都願意行出來。
o 陳生（古玩店老板）：六四，我儲了成大堆報紙：大公、文匯、星島、東方...有人出三萬蚊同我買我都唔肯賣，呢d係証據，鬧共產黨就靠呢d。你話無死人？我就拿這些報紙出來！我儲這些報紙的原因係當時我有個大學同學在新華社工作，是高層，他跟我說北京可能要出事了，叫我小心，若出了事，社會不知會變成點。 於是我便開始買報紙。我咁多年都堅持要嘈佢，因為作為中國人一定要繼續嘈，這才對得住歷史，有無效是另一件事，但我一定要話俾全世界知，共產黨幾咁殘忍。
o 肥佬（水電工）：彌敦道旁的大廈有人掟水袋落來，唔知係咩人，d人噓，其他人就跟住噓，圍觀者都有幾千人，我望左陣，十二點鐘就返左屋企，噓～香港人係咁奇怪，好鐘意趁熱鬧。
o Henry（街坊）：當年我都捐了很多錢俾支聯會，好多人都有響應。那時我去到大球場，好多人，坐到滿灑，我帶埋老婆仔女去，但她們慢慢都變得好冷感。點解會咁？有時d人今日支持你，明日又會反返你，群眾心理係咁，有d人可能當時太過傷感，慢慢就冷漠起來，好似拍拖咁，過了十幾年，緊係慢慢淡...我依家年年都有去維園，咪同你地踩單車去囉。
o 貞姐（主婦）：六四應唔應該平反？殺左人當無件事，你話應唔應該平反丫？平反的意思就係要話俾佢知香港市民唔接受共產黨果一套。共產黨唔認錯，要我地擁戴佢？無可能！
o 嫲嫲（主婦）：六四果時我都未落到來香港，仲係大陸。我地果時咩到唔知，咩消息都封鎖灑嫁，都係來到香港先知呢件事。六四應唔應該平反？我地家庭主婦就真係唔識評論呢d野啦，但係其他人講就無所謂，始終都係大事大非。
o 蔡小姐（文化人）：當時我仲係中學生，預備在6月7號和同學去遊行，banner都預備好。點知果朝早收到同學打電話來話遊行取消... 我好失落，這心情屈住係心入面好多年。
o 過度美化八九年的香港也是一種虛偽，無可否認，很多真正關心社會的香港人是值得尊敬的，但當年我們所謂的抗爭成本很低，六四主要是情感的衝擊，六月七日之後，一切回復正常，我繼續急功近利，九二年，在家人協助下，我在西環買了房子，你叫我點去怪責年輕人。(轉載自Vincent Chiu 面書）
o 阿雄（工人）：六四那年，我在收音機廠工作，由於測試收音機，我整天都在聽收音機傳來屠殺的報導，許多人都哭了起來。談到三罷取消，我至今仍忿忿不平。我有被人出賣的感覺；恐怕中共滲入攪事，這理由不是很滑稽麼？！（撰自《工人與民運》）
o 阿明（工人）：三罷那天，老闆覺得反正全港罷工，沒貨可送，不如全廠停工，由於那場騷動，遊行取消，我一人跑去新華社門口吊祭鎮壓中的死難者，不過其他工友都當放假算。（撰自《工人與民運》）
